مطلوب رأي الجميع

[خالد اسعد]

السلام عليكم جميعاً:
أحب أخذ رأي الجميع بتخصيص صفحة خاصة تحت عنوان النقد الساخر
تهدف الى التلميح لبعض الأمور الخاطئة بطريقة لطيفة دون التجريح بالكلام
والهدف تصحيح الكثير من الأخطاء وعلى كافة المستويات :
- العادت والتقاليد
- اصلاحات القرية ( تعليم - بلدية - مسجد - فرن- ......الخ )
- مواضيع المنتدى
- امور أخرى
الشكر مقدماً للجميع لعدم الإساءة لأحد داخل الصفحة
المنتدى مرآة القرية تعكس أخلاقنا وآدابناحسِّن صورتها بكلامك الحلو

[احمد الاسعد (ابو شريف)]

والله يا خالد اقتراح حلو
بس المشكلة هون بدهم يكون الردود كلها مشكور على موضوعك
والله يعطيك العافية
ولما واحد بيعطي رأيو بصراحة بصير قليل الادب
يعني لو واحد قال الموضوع تافه وهو بكون تافه
صاحب الموضوع بيزعل مع أنو الموضوع تافه
على كل حال أنا معك وتوكل على الله

[خالد اسعد]

خليك متل مابعرفك كفو
قول الصراحة بس بطريقة حلوة ماتجرح لأنو انا وانت ممكن ننحط بموقف النقد واكيد مامنحب حدا يجرحنا
هدفنا بسيط هو الإصلاح
ورح نحاول نألف بين القلوب من خلال الصفحة

الف شكر يالغالي

[ayham774]

والله أنا بقول ونعم الرأي وإذا هلشغلي في إفادة ليش لا الله يسر تحياتي اخ خالد

[بشار ابو حيدر]

حلوو بس انا بدي اعطيك النقد من هلق
- العادت والتقاليد
حلوه عندنا في الضيعه بس بدأت تتنتسى للأسف


- اصلاحات القرية ( تعليم - بلدية - مسجد - فرن-
بالنسبة للتعليم : مابعرف شوو وضعه بس بعتقد انه صابه زكام ( مرشح )
بلديه : مافي احلى من هيك
مسجد : حلو بس لولا العشره المبشرين بالجنه مايوقفوا وراء الامام ويدعو بالدين لان كلنا بنعرف ليش وشو هن ياناس الدين مو هو للتفاخر والكبر
فرن : الله يخلي ابو فؤاد من جديد عم يعمل خبر غير شكل بس من اول شوو بدي احكيلكم وعلى جميع الاحوال الله يعطيه العافيه
......الخ )
- مواضيع المنتدى
متل الرمان في منها حلو ومنها حامض ومنها لفان وكل واحد اله ذوق ورأي خاص فيه وعلى الجميع احترام الاراء على الاقل ما يكون فيه تجريح
- امور أخرى
انا بدي احكي عن موضوع النميمه للاسف منتشر بكثره في الضيعه بشي مو معقول مابعرف ليش
واسف للاطاله وشكرا ابو احمد

[حسين الأحمد]

طلب معقول وان شاء الله بيتم اضافة هذا القسم

[صمت السنين]

اخي الكريم موضوعك في غايه الاهميه

اخي الكريم كلامك صح

المنتدى عباره عن بيت يجمع من اشخاص مختلف البلاد

احنا مندخل المنتدى لثقافه والمعرفه وتعارف بين الاخوه

يعني يفترض علينا ان نحترم قلم العضو حتى لو ما عجبنا الموضوع

انا برأيه الصراحه حلوه لكن بالحفاظ على مشاعر العضو وبدون منجرحه فينا نقدم له لفت نظر او توجيه
لكن بدون جراح
وانا افضل اذا لم يعجبني الموضوع ما برد عليه لكي لا اجرح الاخ او الاخت
لاننا كلنا اخوه هنا في بيتا"واحد

يعني حتى لوكان الموضع في هزار نهزر من غير جرح مشاعر احد

- العادت والتقاليد
كل بلد وليها عاداتها وتقاليدها ويلتزم علينا احترامها


- اصلاحات القرية ( تعليم - بلدية - مسجد - فرن- ......الخ )

انا برايه القريه جميله جدا


- مواضيع المنتدى

يجب ان تكون مفيده حتى نتعلم منها ونصلح اخطائنا

- امور أخرى
الامور الاخرى كثيره لكن اهمها ان نكون اخوه هنا بالبيت الذي يجمعنا من مختلف البلاد ويجمع بيننا احرف تتسلسل بكلمه وتنزف لنا الجمل











اتمنى ان نتعامل كأخوه ومحبه في الله بالله

تحياتي

[مصطفى العلي]

تشكرات افندم
موضوعك مفيد كتير يا ابو احمد ومنتمنى مشاركة وعدم تحولنا الي موضوع آخر
وعذرا منكم رح طول في ردي

العادات والتقاليد
لا يوجد افضل واجمل من عادات النيرب
جميع النيرب تشارك بعضها بالعزاء وكل النيرب بتحزن على مصاب احد ابنائها
ويلي بقول وانها اختلفت منقله صحيح انا معكم بس كانت النيرب صغيرة واذا واحد توفى فيها ما بصير لا فرح ولا حتى قبل 3 اشهر وقبلها كان اذا حدا ميت التلفزيون ما بيشتغل قبل 3 ايام وبكل الضيعة ويلي كان بشغله الناس بتصير تحكي عليه
وانا مع التغيير بعدم اقامة اي فرح بعد الوفاة بثلاثة ايام وهذا هو حزن الاسلام على الميت وبعدها لازم يصير فرح ومتل باقي الايام
واما بالافراح كان معروف من قبل ان بالعرس كل عيلة بتطلع بترقص لحال وما حدا بيطلع قبل ما يخلص الفرح
بس هلأ تغيرت الامور وصارت كل الشباب ترقص سوا والكباريه لحال وهيك برأيي احلى بكتير

التعليم



سبق وحكينا فيه قبل هلأ انه اكبر مشاكل الشباب
التعليم بشكل عام في النيرب ما دون المستوى المطلوب ولا يزال يحتاج الى جهد من الجميع
والدراسة في النيرب في الخمس سنوات الاخيرة اختلفت عما كانت عليه واصبح في اهتمام من قبل الاهل ومن قبل الطلاب نفسهم
ولكن اظن ان المدارس ما زالت مقصرة بشكل كبير وخصوصا مسألة الوكالات لطلاب الابتدائية
وهون الغلط التفكير بان الدراسة في الابتدائية غير مهمة وانما بالعكس تماما فهي اختفلت عن قبل خصوصا دخول مواد اجنبية ببداية المراحل الابتدائية

البلدية

هون حطنا الجمال
وخلينا نحكي بصراحة كبيرة
من شي 5 سنين وقبل صدور قرار تنظيم العمراني كانت العمران مسموح للجميع ومن دون رخص
واستمر هالشي بعد صدور هالقرار وطبعا كله لمصلحة المواطنين ( اقل تكلفة )
ولقد تغاضدت البلدية بالبداية عن القرار ( وهدا احسن لالنا) وانما ما شاء الله الخطوط الحلوة لعبت دورها واطردت البلدية الى
تطبيق القرار على الجميع وزادت علينا المصاريف بالترخيص (نحن جبنا البلى على حالنا)
وبشكل عام عملها جيد انما تحتاج بعض الدعم من المحافظة بالاضافة الى الم تنظيم بتوزيع الخدمات بكل حارتها وليس حارة اكثر من الاخرى


المسجد

مافي احلى من هيك ومنتمنى لو يتم توسيعه اكبر لان هلأ ما عاد يكفي بصلاة الجمعة
مع وجود باقي الجوامع الاخرى لاداء باقي الصلوات

الفرن

يا سيدي النا فخر ان خبز النيرب من افضل الافران المحيطة بنا
ومشكور ابو فؤاد على تعبه وتحديثه
والله يعينه يا شباب شغلته مافي اصعب منا
وكيف بيستحمل ما بعرف
رح اضربلكم مثال :
بيجي واحد بدو يسجل اسمه : بصيح ابو فؤاد سجلي فلان صيح ابو فؤاد سجلي فلان صيح ابو فؤاد سجلي فلان صيح ابو فؤاد سجلي فلان
بيسجله
بيرجع

بصيح ابو فؤاد :
ابو فؤاد سجلتلي فلان بو فؤاد سجلتلي فلان بو فؤاد سجلتلي فلان بو فؤاد سجلتلي فلان
بقلو اي سجلتلك
بيرجع بصحله
ابو فؤاد ما طلع دور فلان ابو فؤاد ما طلع دور فلان ابو فؤاد ما طلع دور فلان
وهيك لحتى ياخد الخبز
بقى شو بدو يصير ليصير
ههههههههههههههههه
والله الله يعينو

مواضيع المنتدى

بشكر كل الاعضاء الكرام على مشاركاتهم يلي عبتحلي الموقع احلى واحلى وعبتزيد التواصل مع الاهل
بس بحب نبهكم يا شباب على تخفيف تنزيل الصور في الموقع ان كان بالتواقيع وان كان بالردود تخفيفا من ضغط الموقع
وتصفحه وخصوصا للسرعات البطيئة في سوريا
الف شكر ابو احمد على الموضوع وعذرا كتير للاطالة

[احمد زكريا]

السلام عليكم جميعاً:
أحب أخذ رأي الجميع بتخصيص صفحة خاصة تحت عنوان النقد الساخر
تهدف الى التلميح لبعض الأمور الخاطئة بطريقة لطيفة دون التجريح بالكلام
والهدف تصحيح الكثير من الأخطاء وعلى كافة المستويات :
- العادت والتقاليد
- اصلاحات القرية ( تعليم - بلدية - مسجد - فرن- ......الخ )
- مواضيع المنتدى
- امور أخرى
الشكر مقدماً للجميع لعدم الإساءة لأحد داخل الصفحة
المنتدى مرآة القرية تعكس أخلاقنا وآدابناحسِّن صورتها بكلامك الحلو

هلق انا الي فهمتو انو ابو احمد بدو قسم للنقد الساخر بحيث تتم مناقشة المواضيع انفة الذكر بهذا القسم ومو تكون المناقشة عبارة عن ردود على الموضوع الي طرحوا بس بتوقع يا ابو احمد انو صعب تختار موضوع لاحد الأعضاء وتنقدوا بشكل ساخ لأنو رح يعتبر هالشي اساءة شخصية لذاتو بس ممكن الواحد يطرح مشكلة عامة سواء" بالمنتدى او بالضيعة او بأي مكان ويناقشها بمرح (( سخرية من الواقع )) لتخفيف الضغط النفسي الذي يقاسيه الجميع من كثرة المشاكل التي نواجهها يعني على مبدأ { شر البلية ما يضحك} وشكرا" على طرحك يا ابو أحمد

[خالد اسعد]

أشكر كل الشباب للتفاعل السريع وهدا بدل على محبتن للضيعة ورغبة التحسين
بس انا قصدي متل ماقال ابو زكريايعني انا عندي ملاحظة عالمسجد مثلا بطرحها بالطريقة الحلوة
احمد عندو ملاحظة عالبلدية
محمد عالفرن
وهيك ردرود الشباب بتعالج هالمشكلة اللي طرحها الشخص
ابوكامل ردك كان كتير حلو ويبدو غندك حكي كتير كمان
بدنا مشاكل وحلول يا شباب
تقبلو رأيي

[العقيد]

والله هالموضوع جمميل وأرجوا أن ينفذ يسرعة

[anoarasaad]

:9:ورووووودتحياتيورووووود

[anoarasaad]

<P>الموضوع حلو كتير ومفيد با النسبة لأهل الضيعة&nbsp; الله يقويك ابو احمد</P>

[أبو شهاب(السعودية)]

السلام عليكم جميعيا والردود والاقتراحات كلها حلوة ومفيدة بس في فكرة واحد لازم ينتبه عليها مو المهم انو بس نطرح المشكلة المهم انو شلون نعالج المشكلة نعالجها بشكل منطقي بدون ما نأذي حاد ونطلع باقل الخسائر من الاضرار في فكرة كمان انو احد من الاعضاء نزل او طرح مشكلة مو معناتها انو هالعضو بس هو يلي عم يتعرض للمشكلة ونقول انو في الو غاية شخصية في هالمشكلة
الفكرة كتير حلوة بس شقد ما هي حلوة جوز نوقع بمشاكل فيها اذا ما حسنا نتصرف بشكل المنطقي لمشكلة ولحل هذه المشكلة
شكرا أخ خالد على الفكرة
وشكرا

[gihad1975]

الموضو ع لابأس فيه بس بعتقد رح يصيب المنتدى بنوع من المشاكل الله يقدم اللي فيه خير شكرا على موضوعك ياخالد

[عامر]

أنا رح اختصر عليك بأيدك من هلأ وكمان بيفضل على راسنا أبو كامل اذا بيضيف ساحة اقتصاد